Hugleiðing sem kom rétt fyrir jólin en rétt væri að hafa í huga allt árið um kring

22.12.2011

Nú rennur upp sá tími ársins hjá ykkur að þið upplifið hvað mestan kærleik og frið í hjörtum ykkar. Tilgangurinn er sá að þið ættuð finna þennan sama kærleika og sömu hlýju tilfinningar allt árið um kring því þið eruð verur ljóss og kærleika. Þó eru margir sem upplifa sorg og eiga þungbærar stundir yfir hátíðir ykkar. Margir eru ekki í sambandi við sitt æðra sjálf, sambandi við sínar tilfinningar og vita ekki hver tilgangur þeirra er á jörðu. Þeir sem upplifa slíkt sambandsleysi eiga oft erfiðara en hinir sem lifa í kærleika og björtu ljósi. Myrkur læðist inn í huga fólks og það áttar sig ekki á því að bægja því frá með hugsanaskiptum, með því að stýra huga sínum inn á jákvæðari brautir. Þegar kærleikurinn verður mikill í kringum þessar sálir finna þær meira fyrir því hversu ótengdar þær eru og upplifa sorg, upplifa vanlíðan. Þetta ætti í raun ekki að vera svona en þið hafið hagað samfélögum ykkar þannig að það byggist upp á því að leita eftir veraldlegum hlutum, leitast í störf sem gefa ykkur góðar fjárhæðir og þið gangist upp í því að kaupa og reyna að njóta þannig í stað þess að njóta þess sem er ekki hægt að kaupa með peningum. Reynið að beina huganum inn á þá hluti sem þið hafið öðlast í gegnum líf ykkar sem ekki væri hægt að kaupa og selja. Finnið kærleikann og þakklætið þegar þið hugsið um ástvini ykkar, eiginleika í fari ykkar sjálfra sem ykkur þykir vænt um og þegar þið hugsið um hve lífið getur verið fallegt í allri sinni mynd. Hugsið um gróður, landslag og dýr og sjáið fullkomnunina í þeim hlutum sem eru skapaðir í ljósi en ekki í verksmiðjum.

Sendið þeim sem eiga um sárt að binda, þeim sem eiga þungan hug og finna til vanlíðunar ljós, sendið þeim allan þann kærleik sem þið finnið í ykkar eigin hjarta og beinið sjónum að því.

Tengið ykkur upp og tengið ykkur við orku jarðar, tengið ykkur líka út til hliðanna og takið inn þá orku sem umlykur ykkur, látið ljósið flæða með hugsunum ykkar og sendið það með huganum á rétta staði. Efist ekki um getu ykkar, efist ekki þó að hugurinn fari ekki þær leiðir sem þið ætlið ykkur, það kemur með æfingunni að læra að tæma hugann betur og að taka á móti öllu sem kemur til ykkar. Þrátt fyrir að ykkur finnist þið ekki vera tilbúin, ekki vera búin að læra nóg, þá skiptir ljósið frá ykkur gríðarlega miklu máli og gerir mikið gagn og veitir hjálp. Sendið það frá ykkur óhindrað, skilyrðislaust.

Opnið fyrir orkuna sem kemur frá þeim sem með ykkur starfa og bjóðið þá sem eru í ljósinu velkomna með ykkur til að vinna með ykkur, leiðbeina ykkur og hjálpa til að starfið gangi sem best. Farið ykkar leiðir, engin ein leið er réttari en önnur og þið eruð öll misjöfn og upplifið ekki hlutina á sama hátt. Nýtið tímann yfir þessa daga sem eru framundan til að finna orkuna sem er í kringum ykkur því hún er sjaldan jafn full af kærleika, því miður. Nýtið þann kærleika til að senda ljós til þeirra sem finna ekki til kærleikans, þeirra sem finna ekki til þakklætis og einblína á myrkur og veraldlega hluti. Sendið einnig til þeirra sem eru sjúkir, leyfið heilunar orkunni að komast í gegn og nýtið þann tíma sem er að ganga í garð. Þið fáið mikið þakklæti fyrir og gefið hvort öðru bestu gafirnar með slíkum hætti. Haldið áfram að gera slíkt þó að tími hátíða gangi yfir, hafið kærleika og ljós að leiðarljósi allt árið um kring og þá munu opnast ykkur dyr og gluggar og tækifærin munu koma til ykkar ásamt því að ykkur á eftir að líða betur og þið finnið ykkar tilgang í kærleikanum.

Lifið í ljóssins friði,
namaste.

Ný skilaboð til ykkar

02.12.2011

Hvaðan koma tilfinningar ykkar? Eru það ykkar eigin tilfinningar sem þið eruð að finna eða eru það annarra tilfinningar? Þið eruð eins og í lögum, líkt og laukur. Þið ættuð að flysja laukinn sem þið eruð, fara í gegnum hvert lag fyrir sig og hreinsa ykkur tilfinningalega til að þið eigið auðveldara eð að taka á móti orkubreytingunum sem eiga sér stað í kringum ykkur.

Byrjið á því að skoða ykkur sjálf, setjist niður og hafið rólegt í kringum ykkur og spyrjið ykkur sjálf að því hvernig ykkur líður? Hvernig líður mér? Hvaða tilfinningar finnið þið? Eruð það ykkar eigin tilfinningar? Finnið þið til reiði? Hvaðan kemur hún, er hún frá ykkur sjálfum komin eða hafið þið fengið hana til ykkar úr umhverfinu? Finnið þið til þess að vera kvíðin? Hvers vegna? Farið yfir það í rólegheitum, skoðið alla kanta og allar hliðar. Finnið þið til sorgar? Hafið þið áhyggjur? Hversu margar af þessum tilfinningum hafið þið burðast með í langan tíma? Leyft þeim að blunda í ykkur án þess að gefa þeim gaum?

Farið yfir tilfinningarnar ykkar, vinnið skipulega og reynið að einbeita ykkur að einni tilfinningu í einu, einni hugsun í einu og losið um þær eins og lög á lauk.

Þið spyrjið þá kannski núna, hvernig get ég hreinsað burtu þessa tilfinningu?

Það eru margar leiðir við það og engin ein þeirra réttari en önnur, engin ein betri en önnur enda misjafnt eftir ykkur hvaða leið hentar ykkur best. Ég mun ekki útlista hvernig, en get sagt ykkur að það að viðurkenna tilfinninguna að viðurkenna og átta sig á að hún er til staðar er oft á tíðum nóg. Þið getið reynt að losa ykkur við hana myndrænt. Þið getið beðið um hjálp við að hreinsa og losna við tenginguna. Farið ykkar eigin leiðir en umfram allt viðurkennið og verið meðvituð um hvaða tilfinningar eru þarna.

Þegar þessu starfi ykkar er lokið, þessari hreinsun sem þarf að eiga sér stað reglulega. Þá getið þið farið að vera móttækilegri fyrir orkubreytingunum. Það er verið að hækka orkuna í kringum ykkur eins og þið vitið. Það er einnig verið að hækka orkuna hjá ykkur sjálfum sem og öllu öðru á plánetunni ykkar. Þið eruð að gagna í gegnum breytingar og það hefur verið undirbúningur undir þessar breytingar í langan tíma. Þær hófust fyrir nokkru síðan en munu halda áfram. Þið völduð að koma og vera á jörðinni á meðan þær breytingar eiga sér stað. Þið völduð þennan tíma. Notið því tækifræði og gerið það sem þið getið við þann tíma. Notið tækifærið og takið þátt. Mörg ykkar eru að taka þátt og finna mikið fyrir breytingunni. Mörg ykkar eru búin að vinna mikla vinnu og eruð komin lengra en hin og eruð farin að bíða eftir meiri breytingum.  Mörg ykkar hafa aðeins leitt hugann að þessu og vita ekkert um hvað málið snýst eða að það séu neinar breytingar en hafið samt fundið eitthvað en ekki getað sett fingurinn á hvað það er.

Núna er tíminn. Tíminn sem þið hafið til að vinna vinnu í sjálfum ykkur, vinna með að hreinsa ykkur tilfinningalega og taka á móti þeim breytingum sem eru að eiga sér stað. Líka þið hin sem eruð að bíða og haldið að þið séuð búin að öllu og að þið komist ekki lengra. Það er alltaf pláss fyrir meiri þroska, meiri lærdóm.

Farið yfir tilfinningarnar, huglægt, skriflega, munnlega eða hvernig sem er. Farið aftur til barnæsku í huganum. Munið þið hvernig var að vera barn, einlægnin og hversu sannar tilfinningarnar voru? Hversu sannar langanir ykkar voru og að þið vissuð nákvæmlega hvað þið vilduð og hvað þið vilduð ekki. Ef það komu upp vonbrigði, reiði eða sorg, þá hleyptuð þið henni út með því að gráta? Þið voruð meðvituð, þið voruð stödd þannig að þið voruð í sönnu sambandi við ykkur sjálf. Reynið að öðlast þann eiginleika aftur, að vera ekki týnd í ykkur sjálfum og að vita ekki hvaðan tilfinningarnar koma eða hvers vegna, viðurkenna ekki fyrir sjáfum ykkur að það séu tilfinningar þarna sem hafa áhrif. Fagnið og þakkið fyrir að geta upplifað allar þær tilfinningar sem þið eigið, þær geta allar hjálpað ykkur við þroskann og við lærdóminn. Fagnið því að geta fundið til reiði og sorgar, að vita að þegar þær tilfinningar koma fram er ástæða til að skoða betur reynsluna sem hefur átt sér stað og þetta eru merki um að þið ættuð að staldra við og meðtaka hvað gerðist. Meðtaka það sem aðrir kenndu ykkur eða það sem þið kennduð öðrum í samskiptum. Þið eruð öll hérna að hjálpa hvert öðru, þið vinnið saman og veljið ykkur saman eftir því hvað þið þurfið að læra. Þakkið fyrir hverja manneskju sem hefur áhrif á ykkur, sama hvort ykkur finnst áhrifin neikvæð eða jákvæð. Þakkið einnig fyrir þær manneskjur sem færa ykkur sorg eða vonbrigði því þið ættuð að gefa því gaum að eflaust var lærdómur fólginn í þeirri reynslu sem þið öðluðust með samskiptum við einmitt þá manneskju.

Verið jákvæð. Lifið í gleðinni, dveljið ekki við tilfinningar fortíðarinnar en viðurkennið að þær eru til staðar og sleppið þeim lausum.

 

Skilaboð að handan til allra sem vilja lesa

8. nóvember 2011

Þið verðið að hlusta, þið verðið að hugsa og leyfa því sem er að koma til ykkar að setjast og melta það.
Þið eruð á svo miklum hraða ykkur er sýnt og þið farið áfram og fáið að vita ýmislegt sem ætti að geta gagnast ykkur en þið æðið áfram á svo miklum hraða að þið nýtið ekki það sem er að koma til ykkar á þann hátt sem ætlað er.

Tíminn er ekkert of mikill, þið verðið að taka ykkur saman og fara að standa saman.
Það er svo mikil sundrung og einstaklingshyggja sem ríkir að þið eruð komin út á ystu nöf vegna þess.
Það þarf að stilla ykkur inn á að hjálpa hvort öðru og hjálpa ykkur sjálfum að læra að lifa í þeirri orku sem ykkur hefur verið ætlað að lifa í en við stöndum frammi fyrir því að þið blokkið á og lokið fyrir og takið ekki eftir lærdómnum, takið ekki eftir því sem við sýnum ykkur.
Við höldum þó áfram að reyna og það mun koma til ykkar á endanum en mætti gerast hraðar hjá ansi mörgum.

Mig langar að fræða ykkur um hvað er að gerast í ykkar plánetu, ég segi í henni því að orkan er ekki einungis á henni og í kringum hana heldur er hún í henni líka og fer djúpt og hefur áhrif á hana.
 Spenna hefur magnast upp og þörf er á losun og hreinsun hjá henni að innan. Einnig þarf að hjálpa henni svo við að hreinsa að utan og verð ég að biðja ykkur um að einbeita ykkur að því að senda heilunarorku til móður jarðar, að biðja ykkur um að hafa hana í bænum ykkar og senda henni ljós.
 Hreinsun mannsins er svo annar handleggur en ég fer ekki nánar út í það hér og nú því það gæti haft önnur áhrif á ykkur en ég myndi ætla mér að segja ykkur frá því núna.
Margir miðlar eru að vakna til lífsins ef svo má segja, þið finnið að orkan er sterkari og að það er opnað fyrir hjá þeim sem hafa upplifað sig sem lokaða með þeirri orku sem er í kringum ykkur nú.
Virkið þessar opnanir, takið á móti því sem kemur því það er til þess að hjálpa ykkur og hjálpa ykkur að skilja og læra betur og dýpra hvað er framundan og hvað þið eigið að gera og hvert hlutverk ykkar er.
Einnig er það til góðs fyrir hvern og einn og eflir ykkur persónulega og hjálpar ykkur að nálgast það markmið sem þið fæddust með hingað á jörðina og hjálpar ykkur með þroskann sem ykkur er ætlað að ná.
Gefið því gaum að líta til himins, lítið til himins þegar færi gefst og sjáið hversu himininn er óendanlega stór.
Svo stór að honum eru engin takmörk sett.
Þannig er það einnig með ykkur sjálf, það eru ekki takmörk og þið eigið að geta farið hærra og dýpra en þið sjálf setið takmörkin á ykkur og leyfið ykkur ekki að fara á þá staði sem þið sannarlega getið og ættuð að gera.
Ég segi ykkur enn og aftur að óttast ekki um ímyndun og óímyndaða hluti því það er þráður sem sker á milli en þið lærið að vega það og meta með tímanum og ykkur getur virst sem þið ímyndið ykkur til að byrja með en skiljið svo þegar lengra er komið hvað greinir á milli.
Ekki loka á og hugsa með ykkur að þið séuð bara að ímynda ykkur hlutina, leyfið hugsunum og tilfinningum að flæða óhindrað og sleppið því að setja veggi utan um allt. Það þarf ekki allt að vera flokkað í kassa og box eins og þið virðist eiga til að vilja gera.

Stundum skortir ykkur orð yfir það sem þið vitið eða finnið og það er allt í lagi, leyfið því samt að vera með ykkur og leyfið sýnum og draumum að flæða án þess að þurfa að skilgreina þá til hins ýtrasta.
Þið skiljið betur eftir á hvers vegna það er.
Einu takmörkin sem eru ykkur sett hafið þið sett sjálf og nú er tíminn til að losa um þær hömlur sem eru að hafa áhrif.
 Þið þurfið á hvort öðru að halda og gerið ykkur sýnileg fyrir hvort öðru, standið saman og leyfið sundrung ekki að komast að ykkur.

Leyfið ljósinu að koma til ykkar og vera partur af ykkur alla daga. Leyfið kærleikanum að dafna og flæða í gegnum ykkur.
Tengið ykkur við ljósið og finnið kærleiksorku fljóta í gegnum ykkur og frá ykkur til hvors annars. Það er markmiðið.
Markmiðið er einfalt í eðli sínu og ykkar tilgangur er að hjálpa og byrjið þá á því að hjálpa hvort öðru og hjálpa þeim sem eru hjálpar þurfi, notið bænir og hugsanir til þess.
Hjálpið plánetunni sem leyfir ykkur að búa hér, hjálpið henni og með því hjálpið þið ykkur sjálfum á svo margan hátt.
 Einfaldið hlutina frekar en að flækja þá, reynið ekki að skilja allt sem gerist í kringum ykkur, verið bara til og munið að njóta nútíðarinnar.

Nýtt bréf, skrifað af leiðbeinanda mínum.

Tilgangurinn er mikill. Tilgangurinn með því að ganga hér á jörð meðal ykkar og þið meðal hvors annars. Þið sjáið ekki öll tilganginn en það má benda ykkur á að tilgangurinn helgast allur samkennd, hann helgast kærleika og hann helgast því að sjá ljósið í hvort öðru. Að læra að elska ykkur sjálf skilyrðislaust og að læra að elska aðra og stækka ykkur á þann hátt og maður gæti sagt að reyna að hámarka sig en það er aldrei hægt að ná hámarki þó því vöxturinn heldur endalaust áfram.

Opnið fyrir flæði ljóssins, opnið fyrir það inn í hugann með því að færa ykkur í átt til betri lífs og opnið fyrir það í hjartanu með því að leyfa ykkur að elska. Ekki kryfja og efast um þær tilfinningar sem þið finnið. Leyfið þeim að vaxa og dafna og leyfið nýjum tilfinningum að koma til ykkar. Þið eruð tilfinningaverur, þið eruð ljósverur og þið lifið því miður of mörg í skugga og án sambands við ykkur sjálf. Það þarf ekki mikla vinnu til að virkja sig á þennan hátt, bara að gefa sér smá tíma til að opna aðeins fyrir gáttina og leyfa hlutunum að flæða og koma sjálfkrafa.

Það er margt stórt að gerast, stórt á ykkar mælikvarða. Indland, Grikkland, Rússland. Jarðskjálftar, eldgos, efnahagsvandræði og mannvonska sem kemur upp á yfirborð. Spilling. Ég gæti talið upp lengi, farið varlega og gleymið ykkur ekki í hörmungum ykkar heims, gleymið ykkur frekar í gleði heimsins og því sem veldur góðum tilfinningum en ekki kvíða og vanlíðan. Það er verið að stilla af orkuna hjá ansi mörgum, það þarf að samræma orkuna við þær orkubreytingar sem hafa orðið á plánetunni og það tekur tíma að finna jafnvægið aftur fyrir ykkur sum.

Það munu verða kraftar sem valda miklum breytingum sem þið eigið eftir að reyna að skilja en vísinda­menn ykkar tíma fá engan botn í, enda er kunnáttan takmörkuð. Það verða breytingar á landi og sjór mun ganga á land jafnframt í kjölfarið og það verður erfitt fyrir ykkur að skilja hvernig eða hvers vegna þett gerist. Ég fer ekki nánar út í það, bíðið og sjáið og látið ekki valda kvíða því kvíði er ekki það sem þið eigið að vera að finna. Finnið til náungakærleika og gleði, notið hæfileikana til að elska, þið hafið öll þann eiginleika og hæfileika til að elska óendanlega, skilyrðislaust og virkjið það. Byrjið á ykkur sjálfum, þeim sem standa ykkur næst og elskið svo aðra.

Ég hef þetta ekki lengra núna, meltið þetta í smá skrefum og lesið yfir aftur.

Kahn.

Skilaboð að handan, í gegnum ósjálfráða skrift.

29.10.2011

Þú spyrð um sannleika varðandi orkustöðvarnar. Þær eru þarna, þær skipta líkamann ykkar og andlega líkamann verulegu máli. Hlutverk þeirra, þær hafa hver fyrir sig mörg hlutverk og gegna þeim án meðvitundar okkar. Ekki þurfið þið að kafa djúpt í að skilja hvernig hver og ein vinnur heldur skiptir máli að vita hvæar þær eru staðsettar, og kunna að hreinsa þær, kunna að virkja þær.

Fyllið þær af ljósi og látið ljósið hreinsa, látið hjartastöðina finna hvort það er eitthvað sem þeið eigið eftir að heila og hreinsa í henni sjálfri, hún tengist tilfinningum og tilfinningar tengjast oft samskiptum.

 Hvaða samskipti hafið þið átt sem hafa skilið eftir sig í hjartastöðinni eitthvað sem þarf að endurvarpa huganum á og hreinsa út úr henni. Hvaða samskipti og tilfinningar hafa myndast í kringum þau sem hafa hjálpað hjartastöðinni að vaxa og þroskast.

Skoðið samband milli foreldra og barna til dæmis, hugsið um börnin ykkar með hjartanu ekki með huganum og látið hjartastöðina vaxa og dafna á þann hátt með því að hugsa um aðrar manneskjur eða dýr sem eiga stóran þátt í því að skapa hvernig tilfinningaverur þið eruð.

 Ef þið rekist á hugsanir sem tengjast öfund, græðgi, hatri, almennum pirring eða þið finnið eins og þið dökknið og það kemur einhvers konar drungi yfir ykkur eftir að hafa hugleitt inn á samskipti sem hafa valdið þessum tilfinningum þá er spurning um að skoða það betur og fara dýpra og þið ættuð að biðja um hjálp við að laga það.

Ekki burðast með vonbrigði, reiði eða annað slíkt út í ykkur sjálf eða aðra því það heldur aftur af þroska og vexti ykkar og veldur stöðnun.

 Þið viljið fá að vita meira, það er gott. Þorstinn í fróðleik er af hinu góða og svörin ættu að kalla á meiri þorsta eftir að fá að vita enn meira.

 Ykkur er sýnt eins mikið og sagt eins mikið og þið ráðið við í það skipti, við megum ekki grípa fram fyrir þroskaferlið hjá ykur því þið þurfið að læra hlutina sjálf og megið ekki bara lesa það eins og í bók því þá er tilgangnum ekki náð.

Þið hafið valið ykkur að fara ákveðinn veg, hver fyrir sig og upplýsingarnar sem þið megið fá eru ekki alltaf það sem ykkur langar að vita í það skiptið því hugurinn hleypur á undan ykkur og ykkur langar að vita allt.

 Opnið fyrir orkuflæði á milli orkustöðvanna ykkar, leyfið því að flæða óhindrað á milli og mynda heild sem er með kjarna víðast hvar þar sem orkustöðvarnar sjálfar eru staðsettar.

Víkkið út sjóndeildarhringinn ykkar með því að leyfa ykkur að dreyma, ímyndun og dagdraumar hjálpa ykkur að þróa og þroska með ykkur þriðja augað og hafið ekki áhyggjur af því hvað er ímyndun og hvað ekki. Þegar maður er að æfa sig þá skiptir það ekki öllu máli enda er ímyndun oft af hinu góða og gerir ekkert annað en að halda ykkur á réttri braut.

Enda er nauðsynlegt að vera lifandi og eiga sér drauma og þið eigið sannarlega að sjá fyrir ykkur þegar draumarnir ykkar rætast og leyfa því að taka á sig mynd í kollinum á ykkur því að skýrir markmiðin betur og þið munuð þá frekar feta ykkur inn á þær slóðir að ná þeim.

Ég hef sagt ykkur að halda ykkur á jákvæðum brautum, jákvæð orka er það sem þið þurfið að einbeita ykkur að á þessum tímum. Orkan í kringum ykkur og í ykkur hefur breyst og er að breytast enn og mun halda því áfram þar til hámarkinu verður náð.

Ég mun ekki gefa tímasetningar sem munu ýta undir kvíða og valda því að þið gleymið því að það er ferðalagið að þessum tíma sem er að skipta máli en ekki hver útkoman verður þá, þið fáið að vita áður en að því kemur hvenær tíminn er og hvað þið eigið að gera.

Núna skiptir máli að breyta orkunni í huganum og hjartanu og láta kærleikann flæða á milli ykkar.

 Myndið með ykkur hringi, þar sem þið notið kærleikann og leyfið honum að magnast upp og flæða. Hugleiðið á sama tíma, Látið orkuna magnast upp með fjöldanum.

En gerið það líka í sitthvoru lagi og látið ljósið og þá yndislegu orku sem fylgir ljósinu og kærleikanum ná yfirhöndinni yfir kvíða og áhyggjur, yfir neikvæðni, sorg og reiði, yfir eftirsjá því þurfið sannarlega ekki að hafa eftirsjá og eigið að sleppa hendinni af slíkum hugsunum og tilfinningum og biðja um hjálp við að hreinsa þær frá ykkur og losna við slíkt sem veldur ykkur eingöngu vanlíðan og dregur úr ykkur.

 Sjáið fyrir ykkur að þið séuð gangandi ljós, að þið leyfið ykkur að flæða. Að þegar þið hittið annað fólk að þá leyfið ljósinu ykkar að flæða um herbergið og leyfið því að fylla annað fólk líka. Fáið fólk til að hugsa jákvætt með ykkur með því að benda þeim á að fara jákvæðu leiðina að því sem það er að gera

 Með tímanum þurfð þið svo að læra meira en grunnurinn er að halda sér inná brautinni þar sem trú og staðfesta, kærleikur og góðmennska ræður ríkjum.

Smávægileg atriði eins og láta eitthvað smáatriði fara í taugarnar á sér eins og þið orðið það, að láta smáatriði eða eitthvað í fari annarra hafa neikvæð áhrif á hvernig ykkur sjálfum líður er eitthvað sem þið þurfið að læra að breyta og sleppa takinu á.

Þetta er bara vani, eitthvað sem samfélagið ykkar hefur kennt ykkur með dómhörku sinni og formfestu á hvernig hlutirnir eigi að vera en í stað þess að horfa með opnum augum á hvernig hlutirnir eru raunverulega og samþykkja það með opnum hug.

 Biðjið og verið þakklát fyrir það sem þið hafið, því innst inni ef fólk leiðir hugann að því þá eru allir þakklátir fyrir það sem þeir hafa. Allir hafa hluti sem þeim þykir vænt um, hluti sem þeir geta fundið að í hjartanu skipta þá svo miklu máli og notið þessa hluti til að byrja á að finna þakklætið, finna kærleikann gagnvart því fólki sem þið elskið.

Þroskið ykkur svo út frá því og sleppið því að dvelja yfir tímum sem eru liðnir, varðveitið minningarnar en ekki dvelja í fortíðinni og dvelja í því sem þið hafið þegar misst.

Ekki dvelja yfir því sem þið eigið ekki, því sem þið viljið öðlast í framtíðinni. Látið frekar svoleiðis hugsanir á jákvæðan hátt í draumana ykkar og setjið ykkur jákvæð og góð markmið með að þið viljið ná þangað seinna meir en lifið í nútíðinni og horfið með réttum augum á það sem er í kringum ykkur nú.

 Gleymið ykkur ekki í lesefni sem skiptir ekki máli og munið að skoða ekki bókstaflegar merkingar þess sem ykkur er sagt og þið lesið heldur finnið boðskapinn í því og túlkið fyrir ykkur.

Það má lesa sömu bókina á margan hátt, fer eftir því hver er að lesa og hvaða boðskap hann þarf að fá í það skiptið sem hjálpar honum mest að þroskast. Þannig er það einnig í samskiptum og öðru því sem þið takið ykkur fyrir hendur, þið takið þann boðskap og þá fræðslu úr sem þið eigið að nota í það skiptið.

 Nú vil ég miðla þessu til ykkar því ég vil að þið lærið að hugsa upp á nýtt með kærleikanum, þið sem þurfið að læra það. Að leyfa ekki efanum að pota sér inn í allt sem þið gerið heldur halda áfram og leyfa trúnni á hið góða og trúnni á ykkur sjálf að ráða för.
Takið til ykkar það sem þið þurfið að læra, það eru einhverjir sem vita þetta en aðrir sem finnst gott að láta minna sig á og finna að þeir þurfi smá staðfestingu á að þeir séu að gera rétt og að þeir séu á réttri braut.

 Þið hafið oft svo miklar áhyggjur af því hvað öðrum finnst og hafið áhyggjur af því hvað ykkur sjálfum ætti að finnast en gleymið því og verið þið sjálf og stolt af því að vera hver þið eruð og munið að þið hafið öll tilgang og ekki láta efa og skort á sjálfsöryggi koma í veg fyrir að þið finnið ykkar tilgang.

 

Skilaboð að handan, í gegnum ósjálfráða skrift.

6. október 2011

Leyfið huganum ykkar að bera ykkur hvert á land eða hvert í heim sem er og finnið hvernig ímyndunaraflinu er gefninn laus taumur og þá munuð þið fara á ókannaðar slóðir og ná jafnvel að kalla fram tilfinningar sem þið hafið bælt og grafið niður. Ekki stjórna huganum heldur bara flakka og fara hvert sem ykkur girnist.

 Við skulum vinna með bleikan lit í dag, lit kærleikans. Kærleikurinn er mér ofarlega í huga því að hann er eitt af því sem mestu máli skiptir að halda á lofti í lífinu og sérstaklega núna á þessum tímum sem þið gangið í gegnum.

Það er ekki nóg að fá brauð og mat ef enginn kærleikur, náungakærleikur og kærleikur til ykkar sjálfra er í brjóstum ykkar. Virkið hann, leitið hann uppi.

Hugsið um það sem er ykkur kærast og finnið hvernig hjartastöðin ykkar dafnar við það, finnið tilfinninguna líkamlega og andlega og staldrið við, finnið hana og stoppið í henni þannig að hún fái að dafna og lifa með ykkur en ekki gleymast í hraðanum sem einkennir ykkar líf.

 Þá er nauðsynlegt að hugsa aðeins um hvort þið hafið gert gott í dag? Gott gagnvart ykkur sjálfum, hafið þið hugleitt orðin sem þið hafið látið út úr ykkur, hugsanirnar sem þið hafið sent út í heiminn. Eru þær fallegar og góðar eða hafa neikvæðar slæðst með. Þurrkið út neikvæðar hugsanir, snúið þeim yfir í andhverfu sína og temjið ykkur jákvæða hugsun.

Það tekur stundum svolítinn tíma en allt er hægt og það kemur fljótlega ef fólk er meðvitað um hvernig máttur hugans er og hvað þið getið í raun haft mikil áhrif á ykkar huga ef vilji er fyrir því.

Hafið þið gert gott gagnvart öðrum? Hafið þið hugsað fallega um aðra eða til annarra, beðið fyrir einhverjum í dag, hjálpað einhverjum í dag.

Faðmað einhvern af mikilli hlýju og gefið af ykkur. Klappað dýrunum eða strokið þeim blíðlega og sett ást í hreyfinguna. Það er gott að gefa af sér og það er gott fyrir ykkur að virkja tilfinningarnar, góðu tilfinningarnar með því að setja þær í verkin, setja þær í hugsanir ykkar og leyfa þeim að verða stór partur af ykkar lífi.

Smá skref í upphafi geta orðið að langhlaupi þegar upp er staðið. Haldið áfram á sömu braut og munið að allt sem þið gerið og hugsið skiptir máli.

Umturnið hugsunum og lífi ykkar inn á jákvæðar og fallegar brautir og þið munið sjá hvernig ykkur fer að líða betur.

Góð orka laðar til sín góða orku. Þetta er svo einfalt í eðli sínu en ekkert er í raun einfalt fyrr en maður veit sannarlega af því.

 Hugleiðið inn á friðinn, frið í hjartanu ykkar, frið inni í jörðinni og frið á jörðinni. Frið í stríðshrjáðum löndum, frið hjá stjórnmálamönnum, frið í hjarta þeirra og huga.

Friður þýðir ekki bara að vera ekki í stríði, friður er svo mikilvægur eiginleiki. Að geta fundið frið í hjarta sér og huga er alveg nauðsynlegt til að geta slakað á.

Þið þurfið að tóna ykkur niður og leyfa ykkur að gera það að minnsta kosti einu sinni á dag, að eiga stund þar sem þið stillið ykkur niður á friðinn og róna, ekki fyrir framan tæki og tól sem afvegaleiða hugann og veita endalausa afþreyingu sem matar ykkur, heldur er betra að eiga frið með sjálfum sér eða með öðrum, þar sem hugurinn fær slökun, þar sem hjartað fær róandi tilfinningu til að tóna sig niður um smávegis ef þið hafið verið á miklum hraða sem einkennir ykkur og ykkar samfélag.

 Farið út, farið í bað, sitjið og hugsið, hlustið á tónlist eða teiknið mynd. Hvað sem er sem veitir ykkur friðþægingu og ró. Munið að róin er mikilvæg, til að ná ró á hugann, til að ná ró á hjartað, til að ná að hugsa skýrar og sjá hlutina í réttu ljósi getið þið ekki þeyst áfram á hraðanum án þess að slaka á.

 Þið þurfið að undirbúa ykkur undir það sem eftir er af lífi ykkar, þið þurfið að taka meiri þátt í ykkar eigin lífi en ekki vera bara peð sem umheimurinn stjórnar og þið fylgið bara með.

Hvar eruð þið á bak við allt sem samfélagið hefur skapað í kringum ykkur?

Finnið rótina á sjálfum ykkur og finnið hvaða leiðir þið sjálf í raun og veru viljið fara, finnið ykkar kjarna. Biðjið um hjálp og þið munuð fá hana, leiðsögnin er alltaf til staðar en eins og ég hef sagt áður þá þarf að vilja heyra og vilja sjá. Látið ykkur skipta máli, látið ykkur finna að þið skiptið sjálf ykkur máli og hættið að velta því fyrir ykkur hvað öðrum finnst og hvað ókunnugum finnst um þær leiðir sem þið farið með ykkur sjálf.

 Þið lifið hér fyrir sjálf ykkur, látið gott af ykkur leiða og notið tímann vel til að þroska ykkur, þróa ykkur , læra og gefa, kenna öðrum. Það er það sem skiptir máli.

 Varðandi eldgosið í Kötlu sem svo margir hafa áhyggjur af hér þá er hægt að segja að hún muni koma með skot og bresta, það kemur gos en við getum ekki sagt ykkur nákvæmlega hvenær það verður eða hvernig því við erum ekki svo mikið að stilla okkur inn á orku fjallsins eða tímasetja hluti á þennan hátt.

Önnur eldfjöll munu gjósa en Ísland er ekkert sér á báti varðandi náttúruhamfarir eða eldgos.

 Það þarf að hafa áhyggjur af hitabreytingum og kulda. Ósonlagið ykkar hefur breyst og þið verðið að undirbúa ykkur undir að veðurfar getur breyst í þeirri mynd sem þið þekkið það. Stólið ekki á að veðrið haldist eins og það hefur gert í langan tíma. Ísland mun þó standa vel að vígi í framtíðinni náttúrufarslega séð og engar áhyggjur sem þið þurfið að hafa af því, það verður vel byggilegt og langt er í að við sjáum fyrir matarskort eða annan skort á landinu sem gæti farið að valda því að fólk gæti ekki búið þar.

 

Áhugaverður tengill

Mig langar að benda ykkur á að skoða tengil sem ég setti inn. Síðan heitir Viska og gleði og þar er heilmargt fróðlegt að sjá og meðal annars bréf frá meistaranum Maitreya. Endilega lesið þessi bréf, þó ekki væri nema einhver þeirra. 

Tengillinn birtist einhverra hluta vegna ekki þarna til hliðar en hér er slóðin: 

 

Ég mun svo setja fleira inn á síðuna smátt og smátt.

Ljós og kærleikur til ykkar.

Fyrirbænir og fjarheilun

Kæru vinir.

Ég tek að mér að gera fjarheilun og senda fyrirbænir fyrir þá sem þurfa á því að halda.

Ég starfa í anda ljóss og kærleiks og fullum trúnaði er heitið. Þessi þjónusta kostar ekki neitt.

Ef þið viljið láta biðja fyrir ykkur eða einhverjum öðrum sendið þá tölvupóst á netfangið [e-mail] og takið fram hvort þið viljið láta biðja fyrir ykkur og / eða senda fjarheilun. Nafn og heimilisfang einstaklingsins sem þið viljið láta hjálpa þarf að fylgja.

Bestu kveðjur, ljós og kærleikur til ykkar.